Dahil sa kabila-kabilang anomalya at batikos ang nabubunyag sa PCSO, nakaisip ako ng maaring maging title nila if ever na maging pelikula ito, siyempre ang magiging bida dito ay ang mga taong sangkot din sa mga intrigang ito.
PAUNAWA: Ito ay base lamang sa aking opinyon, malikhain at malikot na pag-iisip, ang mga impormasyon dito ay base sa mga nakalap na balita sa mga pahayagan. Walang personalan, trabaho lang, ika nga nila. Ito ay para sa mga taong nais malinawan sa mga issue sa bansa sa paraang maaliw din sila.
* Shake, Rattle & Roll XIII- “Mga Multo sa PCSO”
Starring:
Lead role: PCSO director Mabel Villarica-Mamba
Supporting role: Gloria Arroyo, Manoling Morato
Lokasyon: PCSO main office sa Quezon Institute
Synopsis: Madidiskubre ni Mabel, director sa PCSO na may mga multo sa PCSO. Ngunit bago pa man ito ay nakakita siya ng 17 kahon ng guarantee letters sa ibat ibang ospital para sa mga pasyente na humihingi ng pinansyal na tulong.
Makikita niya ang kahon sa opisina ng dating opisyal ng PCSO na itinalaga ni Gloria Arroyo kasama si Manoling Morato bilang board member nito.
Ang nakakatakot at nakakapanghilakbot ay sampung porsiyento lamang sa mga guarantee letters ang nakapangalan sa tunay na pasyente at ang iba ay mga “multo” na siya ngayong iniimbestigahan dahil umabot sa P300 milyong piso ang halaga nito.
Dahil dito sinimulan nila an paghahanap sa mga taong ito at isa sa nadiskubre nila ay isang pasyenteng sumailalim sa tatlong operasyon, isa sa puso, pangalawa sa atay at pangatlo ay muli na naman siyang naoperahan.
Bunsod nito ay nahaharap ang ahensiya sa mahigit P4 na bilyon sa ibat ibang ospital sa bansa. Sino kaya ang mahuhuli ni Mabel at ng PCSO?
* FAST Five
Starring:
Lead role: PCSO General Mana¬ger at board vice-chair Rosario Uriate, Manuel Morato, Jose Taruc V, Raymundo Roquero at Ma. Fatima Valdes
Supporting role: Margie Juico (PCSO Chairperson), Atty. Raoul Creencia (Abugado, Government Corporation), Atty. Eduardo Araullo (Board secretary)
Guest: Gloria Arroyo
Lokasyon: PCSO office, Australia
Synopsis: Nahaharap ang pangkat na binubuo ng limang tao, mga dating opisyales ng PCSO sa ma-anomalyang kontrata na nagkakahalaga ng P42 bilyong piso sa isang kumpanya sa Australia.
Ang nasabing usapin ay naganap noong nakaraang administrasyon sa pamumuno ni Gloria Arroyo. Ayon sa kontrata, ang PCSO at ang TMA group of Companies na naka-base sa Australia ay magiging magkasosyo sa loob ng 50 taon. Ang TMA ang siayng magus-supply ng thermal paper sa PCSO na siyang gagamitin para sa lotto ticket.
Ngunit, dahil kay Margie juico, ang siya ngayong tumatayong chairman ng PCSO, ang nasabing kontrata ay “null and void” dahil na rin sa pag-aaral ni Atty. Raoul Creencia. Kasama ang iba pang board members, inaprubahan ang resolusyon 180 na nagsasawalang-bisa ng TMA contract sa PCSO.
Bukod dito, inatasan ni Juico si Atty. Eduardo Araullo na kasuhan ang nasabing mga ex-PCSO board sa lalong madaling panahon.
* Tinimbang Ka ngunit Kulang
Starring:
Lead role: Gloria Arroyo
Neri Colmenares
Supporting role: Manuel Garcia
Lokasyon: Kongreso
Synopsis: Mabubunyag kay Neri Colmenares ang maanomalyang paglipat ng may P7.2 bilyong pondo ng PCSO sa “intelligence funds” ni dating Pangulo at ngayo’y Pampanga Congresswoman Gloria Arroyo.
Aniya, naganap ito mula 2001-2010 at kasabay nito, si Manuel Garcia na isa ring opisyal ng PCSO ang kinasuhan sa paghingi nito ng 40 porsiyentong komisyon mula sa mga ahensiyang nakatoka sa advertising ng PCSO.
Ayon pa sa kanya, isang liham ang kanyang nabasa mula kay dating PCSO General Manager Rosario Uriarte na inaprubahan ni dating Pangulong Arroyo noong January 4, 2010, na humihingi ng pahintulot na mailipat ang may 50 porsiyento o lumalabas na P150 milyong PR fund sa “ intelligence funds” ni Arroyo, at ito ay bago ang 2010 presidential elections.
Dahil dito, hiniling ni Colmenares sa Kongreso ang pag-iimbestiga kung may awtoridad o kakayahan ang Presidente ang paglilipat ng pondo ng PCSO bago mag-eleksyon at kung saan ito napunta o ang pinagkagastusan.
Mga kaibigan, abangan ang mga susunod pang mga bagong pelikula na kinatatampukan ng mga pinaka-popular at kontrobersyal na tao sa lipunan, Hanggang sa muli, enjoy watching…
No comments:
Post a Comment