“Paraiso sa Bilibid, Silid-Aralan na Animo’y Bilibid…”

Aakalain mo’y isang bangungot ngunit totoo, ilang beses mong kusutin ang iyong mga mata at takpan ang iyong mga tenga ngunit naririnig mo pa rin ang taghoy ng paghihirap ng mga kasama mo, ng iyong kababayan, ng iyong kadugo ngunit mapapapikit ka na lang at mapapaluha dahil wala kang magawa…

Sasabog ang puso mo sa larawan iyong makikita, mga munting anghel na animo’y preso sa loob ng silid-aralan. Dikit-dikit, walang halos espasyo, mainit, maliit, ito’y iilan lang sa maari mong gamitin para ilarawan ang sitwasyon ng mga mag-aaral sa Payatas C Elementary School sa lungsod ng Quezon. Ayon sa kanilang guro na si G. Elmer Garcia, daig mo pa aniya ang bilibid sa sitwasyon ng kanyang klase, buti pa aniya sa kulungan, may tubig at kuryente, hindi katulad ng kanilang silid-aralan na tila impiyerno sa lupa.

Isa sa napakalaking suliranin ngayon ng ating gobyerno ay ang kakulangan ng mga silid-aralan sa bansa. At dahil dito, napilitan ang nasabing paaralan na lumipat pansamantala sa isang bakanteng lote at doon muna manatili habang itinatayo ang kapalit nito. Gawa sa tabla at yero na pinilit pagkasyahin ang halos tatlong libong mag-aaral ng Payatas C. Maalinsangan, mainit, walang kuryente at tubig, nanlilimahid sa sariling pawis ang mga anghel na imbes na makinig sa kanilang guro ay humahanap ng paraan para guminhawa ang pakiramdam. May mga electric fan subalit hindi magamit dahil sa kawalan ng kuryente. Ito ba ang lugar kung saan huhubugin ang susunod na magiging lider ng ating bansa? Ito ba ang lugar kung saan ang ating pag-asa ng naghihikahos nating bayan ay huhugot ng lakas at kaalaman na siyang sandata niya sa pagtahak ng tagumpay?

Sa kabilang banda, nahulog naman ako sa balon ng kawalan ng pag-asa ng aking mabatid ang kaganapan sa NBP o New Bilibid Prison sa lungsod ng Muntinlupa. Hindi lamang magagarbong kagamitan at appliances ang bumulaga sa ocular inspection kahapon sa NBP kundi ang lalong gumulat sa bumisitang mga opisyal ng Bureau of Corrections (BuCor) at Department of Justice (DOJ) at ilang kongresista ay ang mala-motel na kubol na pinaniniwalaang kasama sa special package ng VIP treatment ng mga “Bigtime inmates”.

Kabilang sa napansin ng mga kongresista sa loob ng nasabing kubol ay malaki ang pagkakaiba sa iba pang kubol ng mahihirap na preso kung saan mayroon itong sariling comfort room, exhaust fan at gamit sa kusina gayundin ng TV, DVD player at kasama ring dinatnan ang ilang pornographic DVDs at mga bayolenteng panooring “The Nazi History” at “Prison Break” at iba pang panooring may tema ng pagtakas sa kulungan.

Nakakapanlumo at nakakapanghina ang makitang ang mga kababayan mo ay nahihirapan sa kalagayan nila sa kulungan at pagkasuklam sa mga kababayan nating nagpapaloko at nagpapabayad sa mga turistang tsino nakulong dahil sa droga. Marami sa mga kababayan natin ang nagkakasakit at namamatay dahil sa “poor ventilation”, “dehydration”,mga nakakahawang sakit sa balat, at iba pa. Samantalang ang mga “Anay” na sumisira sa buhay ng mga Pilipino dahil sa drogang kanilang iniaangkat at kinakalat sa buong bansa, ay tila hari at prinsipeng namumuhay sa kulungan imbes na pagdusahan ang kanilang kasalanan. Napag-alaman din na mas lumala ang prostitusyon at droga dahil sa mga ganid sa pera at kapangyarihan na patuloy na nagpapabayad sa mga “V.I.P’s” na to.

Kahapon ay personal ding sinaksihan ni Iloilo Rep. Niel Tupas ang pagbuwag sa mga kubol ng mga Chinese drug lords at mga mayayamang preso at lagi umano nilang pupuntahan ang lugar para masiguro na hindi na mu¬ling itatayo ang mga ito.

“Na-demolish na kanina ang mga kubol. We will check them from time to time,” ani Tupas dahil lu¬malabas na laganap umano ang prostitusyon at droga sa loob ng national penitentiary.

“Lumalabas na malala ang prostitution and drugs. There are so many accounts about it,” dagdag pa ng mambabatas kaya walang silbi umano ang kampanya laban sa ipinagbabawal na gamot dahil sa mismong kalaboso kung saan dapat nirereporma ang mga maling kaisipan at aktibidad ay patuloy pa rin ang criminal activities.
Kaugnay nito, nagbanta rin si De Lima na kakasuhan ng insubordination ang mga BuCor officials na mabibigong imantine ang pagkakabaklas ng mga kubol na ginagamit na bahay ng ‘bigtime inmates’.
Sa makakabasa nito nawa’y magising na tayo at magkaisa para maging maganda an gating kinabukasan. Tigilan na ang siraan at maanghang na palitan ng mga salita na wala naman maidudulot na buti sa kapwa at sa ating bansa. Ang edukasyon ang ating sandata para maabot ang tagumpay at ito rin ang siyang susi para umangat ang ekonomiya ng bansa, subalit mga kaibigan, kung ganito ang nangyayari sa mga paaralan sa ating bansa, anung klaseng mga mamamayan kaya ang magiging produkto nito? At mga kaibigan, ang bilibid o kulungan ay lugar upang ating pagsisihan at ituwid ang ating mga pagkakamali. Ito ang lugar upang ating pagnilay-nilayan ang ginawang kasalanan at tanggapin ang kaparusahan. Subali’t kung ganito ang nangyayari sa ating mga bilibid at mismong mga nasa posisyon pa ang kaisa nila dito, parang tuluyan na nating nilugmok at nilubog ang ating mga sarili at kaluluwa sa kumunoy ng impiyerno. Minsan lang tayo mabuhay, at gawin natin itong kapaki-pakinabang. Ang buhay na ito ay pinahiram ng Panginoon para maging kasangkapan niya sa pagpapalaganap ng kabutihan at salita ng Diyos at hindi para gamitin sa kasamaan at sirain. May panahon para magbago at maituwid ang lahat ng ito, hindi pa huli ang lahat. Sama-sama tayo at magkaisa para mabago ang maling sistemang umiiral sa ating bansa. Hindi bukas, hindi kahapon, hindi sa linggo…Kungdi NGAYON!!!