“Ang mga Babae sa Buhay ni PNoy”

“Behind Every man’s Success is a Woman.” Naniniwala ba kayo sa kasabihang ito lalo pa’t kung patungkol ito sa ating mahal na Pangulo?

Marami ang nagulat at naging napaka-interesante para sa mga kritiko kung bakit mas marami ang babae ang sa kanyang gabinete na tradisyunal na hinahawakan ng mga kalalakihan, bukod pa sa kanyang tatlong kapatid na babae na nagsisilbing tagapayo at confidante. Ngunit, hindi naman maiiwasan sapagkat siya ang nag-iisang anak ng yumaong Pangulong Cory Aquino na tinaguriang “Iron Lady of Asia at The 25 Most Powerful Women of the Past Century,” ng Time Magazine na isang matapang at mapagmahal na Ina ng demokrasya. Dahil dito hindi natin masisisi at kailanman ay hindi siya naging bias sa pagpili ng kanyang mga tauhan na maglilingkod ng tapat sa ating bayan.

Una na rito ay si DOJ Secretary Leila de Lima na dating humawak sa CHR o Commission on Human Rights. Pinatunayan niyang karapat-dapat siya sa posisyon at ilang buwan pa lamang ang nakakalipas ay kinakitaan na ng malaking pagbabago. Nabuksan ang mga matatagal ng nakabinbing kaso at naumpisahan ang kasong plunder kay George Rabusa. Siya rin ang nanguna sa imbestigasyon ng China tourist bus rescue nung nakaraang taon.


Virginia Torres ng LTO na sinasabing “Kabarilan” or “shooting range buddy” ng Presidente na tinaguriang kontrobersiyal ng ilang kritiko. Dahil sa isyung pag-take over ng Stradcom group ng LTO, binatikos siya sa media at ginawaran ng 60 araw na leave of absence ng Pangulo na naging resulta ng pagbibitiw ni DOTC Sec. Jose de Jesus.


Pangatlo ay ang pinakontrobersyal na babae ngayon, si Margarita “Margie” Juico na Chairperson ng PCSO. Nahaharap ngayon si Margie sa ibat ibang issue na pinangunahan ni dating PCSO chairperson Manoling Morato. Si Margie ay dating staff din ni Pangulong Cory Aquino na sinasabing matalik na naging magkaibigan at confidante. Ayon kay Margie, sunod-sunod ang naging mga birada at banat sa kanya ng mga katunggali dahil sa paglilinis niya ng ahensya. Sa kanyang pamamalakad maraming kontrobersiya at anomalya ang kanilang nalaman at kakasuhan ang mga taong sangkot dito.

Ang iba pa sa mga hanay ng kababaihan ng kanyang gabinete ay sina Dinky Soliman ng DSWD, Patricia Licuanan ng CHED, Elisa Gozun, presidential advisor sa Climate Change, Remedios Ignacio Rikken na head ng Phil, Commission on Women, Julia Abad bilang Presidential Management Staff Director General at hinihintay na lang ang pag-aprub kay Conchita-Carpio Morales bilang Ombudsman na kapalit ni Merceditas Gutierrez na nahaharap din sa ibat ibang kaso dahil sa mga katiwalian sa nagdaang administrasyon.


At ang kanyang mga kapatid na tumutulong din sa kanyang mga agenda araw-araw, sina Ballsy, Pinky, Viel at Kris Aquino. Kung matatandaan natin nag-giveway pa si Kris na bitawan ang kanyang mga shows sa ABS-CBN para mag-full time endorser ng kanyang kuya sa presidential election nung 2010. At nung nanalo na si Pnoy ay tumulong na silang magkakapatid sa mga ibat ibang proyekto nito.

Sila’y iilan lamang sa mga “babae” ni PNoy na hindi naman natin lantaran masabing siya’y pro-woman dahil hindi naman siya nagsasabing sang-ayon siya sa RH bill or sa mga isyu sa mga kababaihan. Ang maganda lang naman sa kanyang administrasyon ay binigyan niya ng pagkakataon na maging lider ang mga babae sa mga posisyon na pinagharian ng mga kalalakihan. Pagkakataon na rin ito para patunayan na ang mga babae ay hindi lamang pang-bahay o pang-postura lamang, bagkus sila’y may mga abilidad at talino na tulad din ng mga lalaki.

Sana’y manalangin tayo at magtiwala sa kanila na kanilang tutuparin ang kanilang mga repsonsibilidad at tungkulin kahit na siya ay babae o lalaki. Sila’y pinili hindi dahil sa kanilang kasarian bagkus sa kanilang talino, abilidad,eksperiyensa at sila’y kwalipikado sa mga posisyong kanilang inaaplayan.

Hindi ko rin sinasabing mas maraming babae sa gobyerno ay mas maganda na ang takbo ng Pilipinas na ating naranasan sa pamumuno ni Pangulong Cory Aquino at Pangulong Gloria Arroyo. Bagkus, kanilang gamitin ang kanilang lakas, talino at kagandahan para mas mapaunlad ang pamumuhay hindi lamang ng kapwa nila kababaihan ngunit para sa kapakanan ng sambayang Pilipino at ng ating bansang Pilipinas.