“Bata, Bata, Paano ka Gumawa?”

Napakagandang musika sa pandinig ng mga magulang lalo na sa isang Ina ang marinig ang unang iyak ng kanilang anak pagkasilang nito. Mga pangarap ay unti-unting nabubuo sa unang tapak ng munti nitong biyas. Ngunit sa pag-inog ng mundo, ang lahat ng ito’y nagbago at nakakatakot na ang ganitong sistema ay patuloy na nagaganap at sumisira sa ating bansa.

Humigit-kumulang tatlong milyong bata ang ngayon ay sapilitan pinagtratrabaho ng mga sindikato at ang masakit ay mismong mga magulang ang siyang kumakalakal sa mga munting anghel ng kanilang tahanan.

Madalas nakikita natin sila sa mga lansangan, marusing, nakayapak, namamalimos sa mga taong nagdaraan. Sa mga simbahan, nagbebenta ng sampaguita na di alintana ang sikat ng araw at ang lamig ng gabi. Sa mga sulok ng eskinita at basurahan na pinipilit makakuha ng mga bagay na maaring ibenta para may mailaman sa mga kumakalam na sikmura. Ang iba’y nagpapa-alila sa mga mayayaman kapalit ng maliit na halaga o ang iba’y mga ginawang kabayaran ng mga magulang sa mga hacienda o mga may-ari ng mga lupain dahil sa malaking pagkakautang na ang kinahihinatnan nila’y mga pagdurusa at pagmamalupit sa mga taong akala’y sila ay alipin. . Ang napakasaklap na kinahahantungan ng mga batang ito ay nabubulid sila sa droga at prostitusyon.

Napakapangit na tanawin masilayan ang mga murang katawan ng mga anghel na ito ang mabilad sa mga mata ng mga ganid sa laman at sinisira ang kanilang mga kinabukasan. Mapa-Pilipino man o mga dayuhan hatid sa kanila’y bangungot na laging gumigising sa kanilang mga diwa. Sa kanilang pagtakas sa mga pangitaing ganito ang takbuhan naman nila’y droga na sumisira sa kanilang isipan at katawan. Napakaraming kabataan ang nalululong at makikita sa mga lansangan na may tangan plastic na ang laman ay rugby na nakakapagpatuyo ng kanilang mga utak at kapag lango na sila’y parang mga halimaw sa daan na naninira ng mga bagay na makita nila sa kalye.

Kaya napapanahon ang gagawing selebrasyon ng DOLE o Department of Labor and Employment na may temang, “Mapanganib na paggawa, bawal sa bata.”

“The DOLE, together with its tripartite and sectoral partners, will join hands today to raise awareness on the plight of child laborers and to demonstrate the country’s solidarity in the global campaign against child labor,” ani DOLE a¬cting Sec. Danilo Cruz.

Sa paggunita kahapon sa World Day Against Child Labor ay inilunsad ng kagawaran ang Philippine Program Against Child Labor. Sa pagkakalunsad ng nasabing programa nawa’y mailigtas at maprotektahan ang mga musmos nating mga kababayan sa kuko ng mga masasamang elemento sa lipunan.

Sa pagpapatuloy ng administrasyon ni PNoy, sana tuluyan ng masugpo ang paggamit sa mga batang walng muwang at lakas para labanan ang mga demonyong sumisira sa pag-asa ng ating bayan. Sana sa mga pangako niyang linisin ang mga ahensiya n gating bansa, isabay niya ring lipulin ang mga taong nagiging sanhi ng pagkabulid n gating mamamayan sa kasamaan.

Sana lang ay hindi pa huli ang lahat…