Isang Taon ni Pnoy:Aprub ba sa mga Pinoy?

“I told you before: you are my strength – the strength that comes from the successes that we are reaping now and the upcoming fulfillment of what we have been dreaming of. This will never change: you are still my boss” - PNoy
Ipinagdiwang kahapon ang ika-isang taong panunungkulan ni Pangulong Benigno Aquino Jr. sa PhilSports Arena sa lungsod ng Pasig. Ayon sa Pangulo ngayon ay nagsisimula na tayong umani dahil sa mahusay na pamamahala o sa tinatawag niyang “Daang Matuwid”,tunay nga ba?
Sa pagtapak ng Pangulo sa unang anibersaryo ng panunungkulan ay ini¬lunsad nito ang “Pilipinas Natin” campaign na kinapapalooban ng Philippine Development Plan (PDP) para sa taong 2011-2016. Layunin nito na paigtingin ang Private-Public Partnership sa ating bansa.
Ang PDP ay batay sa social contract sa taumbayan na nagsisilbing kanyang campaign platform at nagpapatibay ng kanyang pag-upo bilang Pangulo ng ating bansa at maitaguyod ang inaasam na pagbabago ng taumbayan.
Isa rin itong road map at comprehensive program of action na binuo makaraan ang malawakang konsultasyon sa iba’t ibang sektor sa mga stakeholders para ang mga hangarin at pangarap ng mga Filipino ay maabot at matupad.
Sa nasabing pagdiriwang, dinaluhan ito ng kanyang mga kaalyado at supporters ng administrasyon particular ang sektor ng mga kabataan. Nangako rin siya na bago matapos ang taong 2013, ang Pilipinas ay hindi na mag-aangkat ng bigas sa ibang bansa. Magkakaloob din ng 4,000 pabahay sa mga sundalo at pulis sa mga susunod na araw at isang seremonya ang gaganapin dahil umabot na sa 2 milyon ang beneficiaries ng programang “Pantawid Pamilya” ng kanyang administrasyon.
“Kailangang magtulu¬ngan, alam ko ang pinanggalingan ninyo. Ako man ay nangangarap na bukas ay magigising na may solusyon na. Pero walang mabilisan, ang kailangan ay mainam, at pangmatagalan. Gusto ko nga po ay tumulin nang tumulin ang pagbabago,” ani Aquino sa kanyang talumpati
Kaya hinihikayat ni PNoy ang buong sambayanang Pilipino na makipatulungan at suportahan ang kanyang mga programa at adhikain dahil hindi niya kayang mag-isa, hindi magiging matagumpay ang kanyang mga plano kung walang taong tutulong at makikiisa. Hindi magiging matagumpay ang kanyang mga reporma kung ang mga empleyado ng gobyerno at ang sambayanan ay magwawalang bahala at kulang ang suporta sa kabuuan.
Samantala, naging sentro rin ng pagdiriwang at naging bida sa kanyang seremonya si dating Pangulo at ngayo’y Pampanga Rep. Gloria Arroyo na minaliit at inalipusta ang kanyang liderato nitong mga nagdaaang araw.
“Ito ay mga minana lang po natin mula kay Gng. Arroyo... ang sistemang nilapastangan. Magpapaloko pa ba tayo? Hindi na ako magsasayang ng panahon, hindi na ako makikipagba¬ngayan. Sabi niya magkaiba po kami, sa wakas, nagkasundo po kami, talagang magkabaligtad po kami… Hindi ko po kayo masisisi na dumaan kayo sa isang dekada ng katiwalian,” ilan sa mga banat ni Aquino kay Arroyo.
Muli rin nitong ipi¬namukha ang record-breaking na utang ng bansa na ipinamana sa kanya ng Arroyo administration at ang mga kuwestiyonableng sistema at paglabas ng pondo sa mga ahensya ng gobyerno tulad ng National Food Authority, Philippine Charity Sweepstakes Office at iba pa.
Ininda rin ni Aquino ang walang-habas umano na pagbakbak sa kanya ng kanyang mga kritiko sa pagbibirong sana ay naging “manananggal” na lamang siya para mahati ang katawan at mapagbigyan ang “sala sa init-sala sa lamig” na trip ng mga ito.
Ang Administrasyong Aquino ay taas-noong nagmamalaki na mataas ang porsiyento ng kanilang natitipid sa paggasta at ang mahigpit na pamamalakad sa lahat ng aspeto. Ngayon na ang panahon para isiwalat at ilantad sa publiko ang mga iregularidad at bulok na mga opisyal sa pamahalaan dahil ito ang magiging susi para mas makalikom at makatipid dahil mawawala na ang mga kurakot at ganid na opisyal. Sa ganitong paraan, ang pamahalaan ay magagawang i-save ang pera at mag-ukol ang mga ito sa panlipunan proyekto.
Nawa’y maging matagumpay ang lahat ng plano at kampanya ni PNoy para sa ating bansa. Kaisa mo ako sa iyong layunin at alam ko na ang lahat ng ito’y hindi maisasakatuparan kung walang basbas n gating Maykapal. Sama-sama tayo mga kababayan ko at ating tulungan maiangat ang ekonomiya ng ating bansa sa tulong ni PNoy- an gating Pangulo. Mabuhay ka PNoy!