Hudyat na naman ng bagong kabanata sa buhay ng mga estudyante kahapon. Sa pagbubukas kahapon ng mga paaralan, samu’t saring problema rin ang nahantad hindi lamang sa ating gobyerno bagkus higit sa mga magulang. Kahapon, halos lahat ng himpilan ng telebisyon at radio ay nakatutok sa muling pagbubukas ng mga klase. Ang himpilan ng pulisya at ang mga baranggay ay nagtulong- tulong din para mapanatili ang kapayapaan,kaayusan at mapigilan ang anumang karahasan lalo na’t manganib ang buhay ng mga estudyante. Sa aking buong araw na pagtutok sa mga pangyayari, aking nabatid na may mga bagong problema na naman kakaharapin ang ating gobyerno lalo na ang “bulsa” ng ating mga magulang. Nakakatuwa rin na nagbukas ang DepEd sa pakikipagtulungan nito sa CHED ng isang “call center” na maaring tawagan ng mga magulang kung mayroon silang gustong isangguni. Mula umaga hanggang sa hapon, iisa lamang ang aking naging obserbasyon ukol sa mga hinaing ng mga magulang. Una, ay mga dagdag na bayarin o kontribusyon na agad na umanong sinisingil sa mga estudyante. Pinaliwanag ng DepEd na may mga kontribusyon umano na legal at dapat na bayaran ng mga magulang. Ito ay mga kontribusyon na kanilang pinahintulutan tulad ng “Boys’ Scout at Girls’ Scout fee,” YMCA, at iba pa, ngunit kanila rin pinaliwanag na ito ay hindi pa ngayon dapat na bayaran agad, maaring ito ay sa susunod pang mga buwan. Pangalawa, ay ang mahirap na pag-e-enrol ng mga estudyanteng nagmula sa mga pribadong paaralan. Hindi naman lingid sa atin na napakahirap na ng pamumuhay sa ngayon, kaya ang iba nating kababayan ay nagdesisyong ilipat ang kanilang mga anak sa pampublikong paaralan. At isa sa kanilang mga naging problema ay ang hindi pagbibigay sa kanila ng “Form 137” na siyang pangunahing requirement sa pag-e-enrol ng mga estudyante. Pinayuhan ng mga opisyal ng Deped na kung ang isang magulang ya may natitira pang obligasyon o utang sa iskwelahang pinanggalingan ng anak ay magkaroon sila ng isang usapin kung maari nila itong hulugan na lamang hanggang sa makumpleto at bigyan sila ng katunayan na ang kanilang anak ay nagmula at nag-aral sa iskwelahang iyon. Pangatlo at siya kong kinagulat ay ang pagsiwalat sa mga “iskwelahang kolorum” o mga iskwelahang walang permit para magturo. Ibinunyag ng pamu¬nuan ng ‘Department of Education’ (DepEd) na mahigit 3,000 mga pribadong paaralan sa bansa ang ‘kolorum’ o walang permit to operate at akreditasyon mula sa departamento.
Batay sa record ng DepEd, lumilitaw na ang mga rehistradong pribadong paaralan sa kanila ay nasa 7,084 habang nasa 4,707 naman ang rehistradong pang-sekondaryang paaralan..
Dahil dito, binalaan ni Education Secretary Armin Luistro ang mga may-ari ng mga paaralan na kumuha ng kanilang permit sa kagawaran sa ilalim ng DepEd Order No. 38 series of 2011.
Kung mabibigo at babalewalain umano ng mga may-ari ng mga pribadong eskuwelahan ang kanyang kautusan ay mapipilitan siyang ipasara ang mga ito.
Nabatid din sa DepEd na karamihan sa mga pribadong paaralan ay sa susunod na Linggo pa (June 13) magbubukas ng klase at tumatanggap pa ang mga ito ng mga enrollees.
Kasabay nito, pinayuhan ng kalihim ang mga magulang na beripikahin muna kung may permit, recognition at accreditation ang mga pribadong paaralan na nais nilang pagpasukan sa kanilang mga anak upang makaiwas sa mga kumplikasyon at problema sa hinaharap.
Ayon sa DepEd, ang mga mag-aaral na nakatapos sa mga paaralan na walang permit to operate ay pinakukuha pa ng “Philippine Validating Test” bago tanggapin sa pmapublikong paaralan upang mabatid kung may natutunan nga ba sila sa kanilang pag-aaral.
Bagamat ‘in full charge’ ang DepEd sa ‘basic education’ sa elementarya at sekondaryang pampublikong paaralan, may ‘supervisory powers’ rin naman ito sa mga pribadong paaralan upang matiyak kung sumusunod sila sa mga ipinatutupad na pa¬nuntunan ng pamahalaan.
Nakakatakot isipin na kung ito ay hindi masusugpo ng ating pamahalaan, anu na lamang ang mangyayari sa edukasyon sa ating bansa. Anung klase mga pinuno ang maaring maging bunga ng iskwelahang ito? At para sa ating mga magulang, napakasakit isipin na ang perang kanilang pinaghirapan ng dugo’t pawis ay mauuwi lamang sa alikabok. Ang inaasahan nilang siyang makakatulong sa pag-ahon sa kahirapan ay tuluyang pa lang nilugmok ng mga mapang-abusong nilalang. Napakaraming matatalino at talentadong Pilipinong kabataan ngayon ang nangangarap na makatulong sa kanilang mga magulang at sa ating bayan. Para sa mga taong manloloko at mapagbalatkayo, huwag naman natin sanang ipagdamot sa kanila ang magandang bukas na naghihintay sa mga kabataang ito.
Ang Daan sa Tagumpay ay bali-baliko, lubak-lubak, nakakatisod at napakahirap tahakin, ngunit para sa akin at sa mga estudyanteng patuloy na nangangarap ng kaginhawahan sa buhay, mas masarap lasapin at namnamin ang bunga ng iyong mga paghihirap. Ang tagumpay na nakamit sa madaling paraan ay parang alikabok na liliparin lamang ng hangin at maglalaho. Ang kayamanang kailanman hindi mananakaw sa atin ninuman ay ang ting edukasyon na pinamana sa atin ng ating mga magulang.
No comments:
Post a Comment