Marikit

Marikit
Masdan mo ang aking karikitan

Wednesday, June 15, 2011

“In God We TRUST”

“ Humayo kayo at magpakarami…”

Ang konsepto sa karapatan ng isang tao sa kanyang buhay ay nag-ugat sa ating Bibliya. Ang Bibliya ay nagsisimula sa kasaysayan ng paglikha ng mundo at ng tao. Ang Lumang Testamento ay naglalaman ng buong kwento ng pakikiisa ng Diyos sa paghubog sa sangkatauhan at ang marubdob niyang pag-ibig sa kanyang nilikha. Ang rurok ng pagmamahal ng Diyos sa tao ay ang paghandog niya sa kanyang anak na si Hesukristo upang sagipin tayo sa ating mga kasalanan at ilayo sa kasamaan kahit na ang kabayaran ay ang mismong buhay nito. Sa kanyang pagkakatawang-tao, inilapit at ibinuhos niya ang kanyang atensyon sa pagpapalaganap ng salita ng Diyos at ang pagtulong sa lahat ng klase ng tao, lalong lalo na sa mga bata, matatanda, mga mahihirap at may mga karamdaman.

Nilikha tayo na kawangis ng Panginoon. Ang mga Katoliko ay naniniwala na sagrado ang ating katawan, nararapat lamang na irespeto, pahalagahan at mahalin. Ipinakita sa atin ni Hesus noong nagkatawang-tao siya sa pamamaraan ng pagtuturo ng salita ng Diyos kung paano pahalagahan at igalang ang ating katawan na templo ng Diyos na nakapaloob ang espiritu ng Diyos Ama, Diyos Anak at ng espiritung Banal.
Tayo ay naniniwalang dapat na isaalang-alang sa isyu ng buhay at kamatayan tulad ng aborsyon, paggamit ng kontrasepsyon, “suicide at euthanasia,”ang paniniwala sa kasagraduhan ng buhay ay dapat na makaapekto sa kanilang desisyon.

Ang lumalalang argumento sa “RH Bill” sa pagitan ng Simbahang Katoliko at ng ating Gobyerno ay nararapat lamang na masupil at magkaroon ng kapanatagan. Ang Pilipinas ay demokratikong bansa na naniniwala sa kalayaan ng bawat isa na ihayag ang kanilang opinyon, saloobin, kuro-kuro at ideya na makakatulong sa pagsulong ng ekonomiya ng bansa. Ang labanan ng Simbahan at ng Estado o pamahalaan ay nag-ugat pa noong panahon ng Kastila. Ang Simbahan ay nagkaroon ng kapangyarihan na makialam at maimpluwensiyahan ang anumang patakaran, batas o desisyon ng pamahalaan sa kanilang mamamayan. Nakakatawang isipin na ang nagpapatakbo ng ating pamahalaan ay ang Simbahan, samantalang sa ating Konstitusyon nakasaad ang paghahati-hati ng kapangyarihan mula sa Estado, Lehislatura a Hudikatura.

Ang Diyos ay demokratiko at wala naman si¬gurong tututol dito. Kailanman ay hindi gumamit ng pamumuwersa ang Panginoon. Kahit pa nga alam Niya na naroon ang peligrong masasaktan din Siya ng kahinaan ng tao, buong pagmamahal pa rin Niyang ibinigay ang kalayaan sa mga ito. Kailanman ay hindi Niya sinaklawan ang “free will” ng Kanyang nilikha. Kahit na kayang-kaya at pwedeng-pwede Niya itong gawin. Nasa Diyos ang buong kapangyarihan. Tayo ay likha lang Niya. Kung gugustuhin Niya ay pwede Niyang idikta ang lahat ng gusto Niya para maging sunud-sunuran lamang sa Kanya ang tao.Pero hindi Niya ito ginawa at mayroong magandang dahilan ang Poong Lumikha kaya Niya ito ginawa.
Kahit sa Banal na Aklat, ipinakita mismo ni Hesukristo sa kanyang mga parabola kung gaano kalaki ang puso ng Kanyang Ama. Sa kabila ng paulit-ulit na pagkakasala at pagkalihis sa landas ng Kanyang mga minamahal na “anak”, hindi Siya napagod sa pagkalinga at paulit-ulit na pagtanggap sa kanila.

Kitang-kita ito sa parabola ng “Prodigal Son”. Binalewala ng suwail na anak ang pagmamahal ng kanyang ama. Halos durugin nito ang puso ng ama nang hingin ang kanyang mana kahit buhay pa ito at malakas na malakas pa. Nilustay ang mana at nang magkahirap-hirap ay saka bumalik sa kanyang tatay na bukas-palad na muling tumanggap sa kanya at pinagdiwang pa ang kanyang pagbabalik. At ang pinakamalaking regalo sa pasaway na anak ay ibinalik ng ama ang lahat ng karapatan nito bilang anak.

Ganyan kabuti ang puso ng Panginoon. Hindi Siya kailanman nagtakwil.

Ano ngayon ang ginagawa ng ilang lider ng Simbahang Katoliko? Tahasan nitong sinasabi na “hindi tunay na Katoliko” ang mga sumusuporta sa Reproductive Health (RH) bill. Sa deretsahang salita, tinatawag nilang mga pekeng Katoliko ang lahat ng sumusuway sa kanilang posisyon para itakwil at labanan ang panukalang ang tanging layunin ay latagan ng kumpletong kaalaman ang mga mag-asawa at nagsasamang magkapareha kung ano ang kanilang mga opsyon para maplano nang tama ang pamilya at malimita ang mga anak sa kakayanan nilang buhayin at palakihin ang mga ito.

Ang Diyos ay demokratiko at umaasa sana kami na ang mga taong nagsasabing sila ay mga “alagad ng Diyos” at mga instrumento para ipalaganap ang mga salita at kabutihan ng Panginoong Lumikha at Manunubos ay isabuhay ang demokrasyang ipinakita mismo ni Hesukristo sa kanyang pamumuhay sa mundo bilang tao.
allvoices

No comments:

Post a Comment